dvātriṃśattamaparivartaḥ |
samyagadhigatānāmeva samādhīnāṃ vyāpārakathanārthamāha | saha pratilabdhānāṃ ca subhūta ityādi | punarapyādarotpādanāya parīndanārthamupoddhātayannāha | tatra khalu punarbhagavānityādi | tadanenāpīti | yasmādāryasadāpraruditasyaivamarthakārikā | tasmādanenāpi na kevalaṃ prāguktaparyāyeṇetyarthaḥ,tathāgatādhiṣṭhāneneti mahānuśaṃsatvena bahvantarāyatvātsahasāpi likhitumaśakyā | tasmāttathāgatānubhāvenopoddhātaṃ kṛtvaivaṃ parīndanāmāvedayannāha | tasmāttarhyānandetyādi | kiṃ nibandhaneyaṃ vistareṇa parīndaneti | tatkasya hetorityāśaṅkyāha | atra hi prajñāpāramitāyāmityādi | tadeva spaṣṭayannāha | tat kiṃ manyasa ityādi | evaṃ saṃkṣiptavistararucisattvānugraheṇa sarvākārajñatādayaḥ sakāritradharmakāyāvasānāḥ sarva evāṣṭau padārthāḥ samupajātā bhavanti | athavā prathamaṃ sarvākārajñatāditrisarvajñatābhilakṣyasthānīyatvena lakṣaṇam | tato vaśitvārthaṃ trisarvajñatābhāvanāṃ prati prayujyate'neneti trisarvajñatāprayogaḥ sarvākārābhisaṃbodhaḥ | tato'tyabhyāsātprakarṣāgamanamiti trisarvajñatāprakarṣāvastho mūrdhābhisamayaḥ | tato'dhigatavastuniśrayāya vyastasamastavibhāvitārthapraguṇīkaraṇamiti trisarvajñatānukramāvastho'nupūrvābhisamayaḥ | tato viśeṣagamanabhāvāttrisarvajñatāniṣṭhāvasthaḥ samyagekakṣaṇābhisambodhaḥ | tatastasya phalamiti trisarvajñatāvipāko dharmakāyaḥ sakāritra ityamunā ṣaṭprakāreṇārthasaṅgraheṇa saṃkṣiptamadhyarucisattvānukampayā pūrvavadiyaṃ jinajananī vyākhyeyā | tathā coktam |
lakṣaṇaṃ tatprayogastatprakarṣastadanukramaḥ |
tanniṣṭhā tadvipākaścetyanyaḥ ṣoḍārthasaṅgrahaḥ ||1|| iti |
athavā''dau sarvākārajñatāditrisarvajñatāsvabhāvaḥ pravṛttigocaratvādviṣayaḥ | sa kathaṃ prayujyata iti | tadanantaraṃ sarvākārābhisambodhādiścaturvidho'bhisamayo hetusvabhāvaḥ prayogaḥ | tasyaivaṃ prayogavato viṣayasya kiṃ phalamiti | tadanu dharmakāyaḥ sakarmaphalamityevaṃ trividhenārthasaṅgraheṇa saṃkṣiptasaṃkṣeparucisattvānurodhena tathaiveyaṃ bhagavatī vyākhyeyā | tathā coktam |
viṣayastritayo hetuḥ prayogaścaturātmakaḥ |
dharmakāyaḥ phalaṃ karmetyanyastredhārthasaṅgrahaḥ ||2|| iti |
idamavocadbhagavānityādi | sānnidhyamātratastasya puṃsaścintāmaṇeriva niḥsaranti yathākāmaṃ kudryādibhyo deśanā iti nyāyena bhavyavineyajanadaiśikatvādhyavasāyādimanantaroditamakhilaṃ prajñāpāramitāsūtraratnatattvamavocaduktavān bhagavānāttamanā hṛṣṭacitaḥ | yadyapi cānyairāryasubhūtiprabhṛtibhirapi kiñciduktam,tattu bhagavadādhipatyādevetyadoṣaḥ | te cāryamaitreyapramukhā mahābodhisattvā vibhaktivipariṇāmena sambandhādāttamanaso bhāṣitamabhyanandanniti sambandhaḥ | cakāraḥ savartrottarāpekṣayā samuccayārthaḥ | tathāryasubhūtirapyāttamanā vacanavipariṇāmena sambandhādbhāṣitamabhyanandaditi sambandhaḥ | evamāryaśāriputrādyapekṣayā pratyekaṃ yojyam | devamānuṣāsuragandharvaiḥ saha vartata iti sadevamānuṣāsuragandharvo lokaḥ | nanu ca ko'parastadvyatirikto loko'sti yastaiḥ saha vartata ityucyate | samudāyasamudāyinorbhedāpekṣayā tathāvacanādadoṣo'yam | api ca santyanye'pi bahavaḥ kinnaramahoragagaruḍādaya ityacodyametat| ete sarve'pi saddharmaśravaṇānnānyat svahitaṃ parahitaṃ ca gurutaramupalabdhavantaḥ,ataḥ pramodakāraṇasadbhāvāt saṃjātapramodātiśayāḥ santo bhagavatā bhāṣitaṃ sādhu bhagavan parameśvara karuṇāmayamūrte subhāṣitamidaṃ yuṣmākaṃ vacamityādinā'bhyanandannityabhinanditavanta ityarthaḥ ||
abhisamayālaṅkārālokāyāṃ prajñāpāramitāvyākhyāyāṃ parīndanāparivarto nāma dvātriṃśattamaḥ ||
sarvaivādhigamārthatattvapadavī samyaksamudyotitā
saṃkṣiptādipadābhidhānakuśalairevaṃ yato nāyakaiḥ |
sarvasmin vihitaśramaiḥ pravacane jñeyo viśeṣastataḥ
prajñāpāramitānaye punarayaṃ granthātmakaḥ kevalaḥ ||
āryāsaṅgamatānusārisudhiyāṃ nirmatsarāṇāṃ satāṃ
bhadrasyāpi gurorbahuśrutavato vairocanajñāninaḥ |
sāmarthyādupajātapāṭavalavo bhadro'karodbhaktitaḥ
spaṣṭārthāṃ harisaṃjñako bhagavatīmāryāmimāṃ sarvaśaḥ ||
tathyātathyavibhāgayuktivikalajñānodayātsaṃvṛtau
saṃsārārṇavapaṅkanimagnamanaso jātāḥ sadā dehinaḥ |
sarve'mī jananīnibandhanakṛtādvījān mayā'ptācchubhāt
sarvākāravarā bhavantu niyataṃ kāyatrayaprāpiṇaḥ ||
saṃbuddhaiḥ sasutairiyaṃ suvivṛtā mātā kka vā saṃsthitā
kvāhaṃ dhīdhanasampadāmaviṣayo vācāṃ tathā'gocaraḥ |
bhūyāsaṃ jaḍa evameti satataṃ janmāntareṣvapyaha-
mabhyuhyaiva midaṃ kṛtaṃ na viduṣāṃ yuktaṃ samullaṅghitum ||
irṣyāśalyavitudyamānahṛdayāḥ śaktā na kartuṃ kṣatiṃ
mithyāmānabalārjitaśrutatayā prajñāvatāmagrataḥ |
pātālādiva khaṃ vidūramasatāṃ puṃsāṃ satāñcāntaraṃ
tasmādeva tathāvidhān prati na naḥ sūkṣmāpi kācidvyathā ||
khyāto yo bhuvi puṇyakīrttinicayo vidvajjanālaṅkṛta-
stasmin sarvaguṇākare trikuṭukaśrīmadvihāre śubhe |
dānāllabdhamahodayasya karuṇādevasya dharmātmanaḥ
sānāthyena sukhopadhānanilaye sthitvā vivekāspade ||
krudhyatkuñjarakumbhapīṭhadalanavyāsaktyatyātmanaḥ
puṇyābhyāsakṛtābhiyogajabalātsamyaksamādāyinaḥ |
rājye rājyabhaṭādivaṃśapatitaśrīdharmapālasya vai
tattvālokavidhāyinī viracitā satpañjikeyaṃ mayā ||
yo'laṅkāro'bhisamaye tadālokaprakāśikā
prajñāpāramitāvyākhyā samāpteyaṃ śubhodayā |
nyūnātirekaśaṅkāyāṃ vijñātavyo'dhunā budhaiḥ
granthasyāsya paricchedo māturasyāḥ pramāṇataḥ ||
kṛtiriyamācārya-haribhadrapādānām ||
ye dharmā hetuprabhavā hetuṃ teṣāṃ tathāgato hyavadat |
teṣāṃ ca yo nirodha evaṃvādī mahāśramaṇaḥ ||